Wahwah's life

行程既最後一日 , 我地搭下午 1:40 既機 , 其實都無咩行程 , 我地 check out 左之後 , 去左桃園機場捷運做左預辦登機 . 做左預辦登機 , 就會返到香港機場先見返你既行李架啦 , 所以唔好將 D 身份証放左入喼呀 . 完全晒所有手續 , 我地就去左食早餐 , 其實係係台北車站附近 , 但因為唔識路搵左好耐 .  間餐廳叫單眼皮雙眼皮 , D 早餐係幾好食 , 特別係 D 麵包 , 真係焗到好鬆軟 ! 不過奉勸各位如果趕時間就唔好去呢到食啦 , 因為 D 野食都整得比較慢 , 要比 D 耐性 .  我地就等左應該有 30 分鐘 ,  點知仲要黎少左一個餐 ,  唔係因為我地趕時間 ,  開聲問佢 ,  我地都唔知 ,  仲慢慢等 .  不過 D 早餐係唔錯既 , 而且睇得出佢地真係好比心機去整 .  如果改善埋整野食既速度應該好好多 ,  因為我地見佢 5 個人企晒係廚房 ,  但係真係諗唔明點解可以咁慢 ,  間鋪又唔係多人 ,  有客人黎買個早餐外賣都要人等 40 分鐘 .  呀妹話班廚師真係要去香港返下工先得 .  香港一間餐廳做野咁慢真係死得 ,  仲要 D 野食唔係貴 ,  我地好似只係食左 200 幾蚊台幣 . 食完個早餐 , 我地就返去台北車站搵間叫香帥既蛋糕店 , 因為我地之前上網見到有人話呢度既香芋蛋糕好好食 , 好多空姐都會買返香港做手信 . 點知間野又係難搵到痴左線 . 兜左幾耐先搵到 . 搞到我地個個都勁心急驚趕唔到飛機 . 

一早同屋企人去左西門町蜂大咖啡食早餐 , 等左一陣就有位 , 我地叫左兩個早餐加一份三文治 , 每人都飲左杯咖啡 , 而我就叫左杯蜂大水滴冰咖啡 , 食物就唔唔太特別 , 杯咖啡係幾好飲 , 可惜員工服務態度其差 , 叫左好多次都唔幫我落單 , 而且全部員工都無笑容 , 黑口黑面 , 唔講以為自己 返左去香 . 真係幾好飲都無用 , 唔會有下次 . 蜂大咖啡食早餐 食完我地係西門町行左陣 , 之後又行左家樂福 , 去旅行行超級市場可以話係必去既 , 因為最多平野執 . 行完就返去西門町 , 行設去西門町期間 , 見到有間買糉既鋪頭 , 見有 D 肚餓就食左少少野先 , 之後就搭捷運出發去淡水 . 淡水其實都係行下街 , 睇下風景 , 食下野 , 近黃昏時間 , 我地仲係岸邊望到好靚既日落 , 拍拖黎呢度岩晒 ! 去完淡水 , 我地沿返淡水線 , 搭捷運落返去士林夜市 , 士林夜市應該係劍潭站落 , 我未試過士林站 , 所以唔知士林站落得唔得 , 但係劍潭站一出就會望到士林夜市 , 由於我地行到好攰 , 所以我地去左食野果個大樓 , 食下野 , 貪佢有得坐 ., 但野食就真係麻麻地 , 所以相都無影 .  相完出左去行一陣 , 又係同九份一樣超級多人 , 想搵條路行下都難 , 好似迫地鐵咁 . 行行下見到有檔臭豆腐好多人排隊 , 個樣好似好正咁 , 我地都忍唔住排埋一份 , 點知一排 , 排左半個鐘都有 .   不過都值既 , 真係幾好食 . 我地仲係同一檔野買左個麻辣冷麵 . 大家去到士林可以試下 , 鋪頭名我就唔記得啦 , 不過我記得間鋪頭係係間廟附近 . 除此之外 , 我地仲食左個阿婆飯糰 , 呢間真係唔記得左係邊 , 但係個叔叔話偽寧夏有分店 , 大家係士林搵唔到 , 可以去寧夏睇下有冇得食 . 因為佢個飯糰 , 真係好多料 , D 料多到 D 飯都包唔住 . 行左一陣 , D 雨愈落愈大 , 我地就無行返左酒店啦 . 順帶一提我地去士林既時候 , 我地想放 D 野入 locker , 點知捷運站 D  locker  Full 晒 . 大家如果想放野入 locker 慢慢行 , 可以去食野果座大樓 . 果到都有好多 locker.