Wahwah's life

千味燒 地址:紅磡寶其利街12號地舖 電話: 2392 7288 係BB 屋企過夜, 最開心就係同佢去消夜. 今天就去左食呢間千味燒, 可能好多人都知紅磡美味佳好好食, 但係我地去到美味佳都幾多人,所以就試左呢間.  我地都點左幾多野食, 燒韭菜,茄子, 菠蘿, 金菇肥牛卷, 雞脆骨,雞腎, 雞翼尖, 豬大腸, 安格斯牛柳粒, 芝心丸同牛油燒粟米.我地揀左小辣, 但係下次應該會食辣D, 試下中辣, 因為小辣係一D辣都無. 兩個人食左咁多野,大約 $170 . 全部野都燒得好好食, 特別係燒 韭菜,茄子同菠蘿, 下次一定會再食, 反而 安格斯牛柳粒就燒得比較硬, 比較乾, 唔太好食. 牛油燒粟米都唔係好夠甜, 如果可以再多小小牛油,甜D就好食D. BTW, 呢間真係唔錯既燒烤店, 我就未食過美味佳, 唔知食物質數差得遠唔遠, 有機會會去試, 但係BB就兩間都試過, 佢就覺得兩間都差唔多. 燒 菠蘿 燒韭菜

Playa de Papagayo 電話號碼 : 2323 1379 地址 : 尖沙咀天文臺道 8 號地下 2 號舖 話說之前我男朋友話想同屋企人食飯 , 佢叫我幫佢搵下食咩 , 我問佢有冇咩特別要求呀 . 佢話之前試過既種類都唔想再試住 . 我心諗你中 , 西 , 日 , 韓 , 台 , 泰都食過晒啦 . 到底搵咩比你食呀 , 大佬 ! 最後比我搵到呢間西班牙餐廳 , 真心覺得自己好勁 ! 餐廳既環境好靚 , 好舒服 , 唔會坐的好迫 . 侍應既服務態度都好好 . 食物就更加唔洗講 , 真係好好食 . 我地點左法國鵝肝雞肉意大利飯 , 烤焗香辣豬仔骨 , 7 吋原條焗蒜香麵包 同西班牙香料原條牛仔骨 . 法國鵝肝雞肉意大利飯 , 鵝肝好香 , 入口即溶 , 唔會好溜 . 法國鵝肝雞肉意大利飯 $168 蒜香麵包 , 焗得好香 , 唔會焗得太乾唔會太油. 蒜香味唔太濃, 唔會食完個口成陣味. 7 吋原條焗蒜香麵包 $38  烤焗香辣豬仔骨 , 好香口 , 辣辣地好開胃 . 可能其他人會覺得焗得太乾身 , 但係我對於我黎講岩岩好 . 烤焗香辣豬仔骨 $78 最後個西班牙香料原條牛仔骨 , 反而有 D 失望 . 因為味道唔算太入味 . 得面頭入面有 D 香料 , 唔知係咪因為條牛仔骨太大條好難整到 D 香科入味 , 所以下次未必會再試呢個 . 西班牙香料原條牛仔骨 $348 呢間餐廳其實好適合朋友聚會同拍拖 , 有得 Book 位 , 我果次去係星期 5.  雖然 Book 既時候佢話限時兩個鐘 , 兩個鐘後要交台 . 但係最終我地食超過兩個鐘都無叫我地埋單走 . 同埋宜家人年紀愈大 , 放工已經好攰 , 已經冇心情去等位 , 有得 Book 位真係岩晒我 .

俺流塩らーめん Oreryu Shio Ramen 地址 : 葵芳興芳路 223 號新都會廣場地下 117 號舖 男朋友係拉麵控 , 搞到我食拉麵都講究左.  今次呢間已經經過幾次 , 但係次次都見好多人排隊 , 所以都冇機會試 . 咁岩上星期 6 有時間去試 . 雖然係星期六既Lunch時間,但 都係好多人排隊 , 不過都唔係等左好耐 . 原本以為咁多人排 , 應該幾好食啦 , 點知真係好失望 . 我點左個辛辣塩湯拉麵 , BB 就點左俺流男盛熟成拉麵 , 同埋另外叫左個大阪燒餃子 . 首先我個碗辛辣塩湯拉麵 , 湯面有一層辣油 , 除左湯面見到好油 , 其實每一條拉 麵都好似比 D 油包住 , 好令 . 其實 碗麵份量唔係好多,但係油到我食唔晒 . 辛辣塩湯拉麵 $62 我男朋友果碗就普普通通 , 佢果碗既湯底反而冇咁油 , 但都唔係太好食 . 叉燒燒到有 D 硬 . 兩件炸雞仲好食過叉燒 , 而且麵做唔到掛湯 . 所以都幾失望 ! 俺流男盛熟成拉麵 $88 反而個大板燒餃子係最好食 , 個醬汁又唔會太甜 , 味道岩岩好 .  大阪燒餃子$38 雖然呢間唔算好貴, 但係真係唔值排咁長隊去試, 特別係我食果碗, 我真係寧願返去煮出前一丁好過. 我真係諗唔明點解有咁多人去食.

德美壽司(紅磡) 電話號碼 : 2334 8884 地址 : 紅磡黃埔新村德民街 31 號地下 1B 舖 呢間係我一直都好想試既日本餐廳 , 因為見朋友成日去食 , 而且上網睇過 Openrice 既評分都唔係太差 . 佢好似有三間分店 , 我地今次係去紅磡果間 . 未講食物質數之前 , 先講下佢既服務態度 . 做左神秘人咁多年 , 我都見慣唔少服務態度差既餐廳 , 但係通常以我經驗 , 價錢貴少少既餐廳 , 通常服務態度都唔好差得去邊 .  相反一 D 連鎖 , 價錢大眾化既食肆就真係差到一個點 . 但係我想講德美呢間餐廳 , 都唔算係平價餐廳呀 , 但服務態度就真係麻麻地 .   首先 , 我地一入到去個接待員已經無咩笑容 , 坐左埋位一陣 , 係無侍應拎餐牌比我地 . 不過我可以原諒 , 因為我見招呼我地果位侍應似係一位新人 . 我見佢好似都比老細鬧咁 .  但係我想講下果位疑似老細 , 招呼我地入去果位接員就係佢 , 全程無笑容 , 黑口黑面 , 唔講以為我得罪左佢 . 不過我覺得無笑容都算啦 , 可能你真係唔鐘意笑 , 或者做野做到太攰呢 . 但係落單既時候 , 同客人有基本既眼神接觸都無 . 我唔知係咪職業病 , 或者我要求高啦 , 但係我覺得落單既時候 , 你簡單望一眼個客人都好呀 . 連同人講野要有眼神接觸既基本禮貌都無 .   好啦 . 唔講其他無為野 , 講下佢既食物質數 . 我地叫左一個刺身拼盤 , 牛油果軟殼蟹卷 , 牛肉炒飯 , 天婦羅凍烏冬 , 牛舌串同燒帆立貝 . 刺身好新鮮 , 好好味 , 最值得試 , 咁多樣野食之中最好味 . 另外 , 個牛油果軟殼蟹卷網上都好多人推介 , 都唔錯 , 幾好食 . 最鍾意就係佢既牛油果切得好厚 , 好好味 , 食落既感覺好豐富 . 最後佢既牛舌真係好好味 , 佢黎到既時候 , 已經忌唔住食左先 , 食左兩件先記得影相 . 牛肉炒飯同燒帆立貝都麻麻地 , 唔太特別 . 反而最令我失望既係個天婦羅凍烏冬 , 個烏冬唔算好好食 , 而個天婦羅就真係唔係好得 , D 蝦唔新鮮 , 炸得唔好食 , 仲要唔熱既 . 我寧願去隔離幾條街食三河屋 , 人地又平D又好食 D.  呢間餐廳係咪真係物有所值 , 真係

雲南小鍋米線 地址 : 葵涌梨木道 112 號地下 5 舖 電話 : 2424 2510 呢間鋪頭既位置其實都幾唔方便 , 如果唔係住葵涌 , 石梨果邊 , 其實真係好少車到呢頭 . 呢間我已經唔係第一次食 , 間唔中掛住就會嘈住要 BB 同我去食 . 因為我暫時係香港都未搵到一間米線係好食過呢度 . 無論堂食同外賣都好多人 , 基本上每次黎都要等位 , 少 D 耐性都唔得 . 我最愛既餸就係冬菇同腩肉 . 冬菇整得好入味 , 腩肉有少少辣辣地 , 唔會好肥 , 最緊要係無豬臭味 , 出面好多米線鋪可能用 D 唔新鮮或者平價既肉 , 好多時都有陣豬臭味 , 好鬼難食 . 最緊要都係湯底 , 湯底好濃郁 , 酸酸甜甜 , 個湯真係正到我每次都想飲晒去 . 湯底有得比你揀幾辣 , 我每次都會叫小辣 , 但係我覺得廚房好似撞手神 , 有時小辣又唔算好辣 , 有時又會辣到我係咁流鼻水 . 米線方面 , 軟硬適中 , 唔會煮到好淋 , 岩晒我 , 最憎食 D 淋到好似唔洗咬既米線 . 大鑊啦 !  大鑊啦 ! 我已經一路打一路流口水 ,  又掛住碗米線啦 !!😋😋😋😋😋 冬菇腩肉小鍋米線小辣

寶城美食店 地址 : 紅磡馬頭圍道 37 號紅磡廣場地庫 2-3 號 電話 : 2333 0033 上網經常都會見到有 post 介紹 香港有咩餐廳炸雞脾好食 , 但係好似都少介紹這間餐廳 , 這間餐廳位於紅磡廣場地庫的寶城美食店 . 除了地點唔方便 , 餐廳亦非常囂張 . 餐廳只會係星期一至星期六營業 ,   營業時間 07:00-18:00. 星期日及公眾假期休息 . 唔做夜晚又唔做公眾假期 , 對於我地呢 D 返 1-5 既打工仔 , 除了星期 6, 平日 真係好難食到 .  好似唔憂做咁 . 呢度最出名緊係炸雞脾啦 , 次次黎食炸雞脾都熱拿拿 , 肉質鮮嫩 , 切開有肉汁流出 ! 我次次黎都食炸脾飯 , 佢有好多汁可以揀 , 有粟米汁 , 黑椒汁 , 豉油 , 磨菇汁 , 咖哩汁 , 沙嗲汁 , 蒜蓉汁 不過我最鐘意食都係西汁 . 除了炸脾飯 , 呢度既例湯都好好飲 , 佢呢度既例湯唔係味精湯黎架 , 所以飲完都唔會口渴 . 如果要飲真係要早少少黎 , 因為好快就賣晒 . 我的最愛就係椰子煲雞湯 . 

三河屋 地址 : 紅磡明安街 14 號寶石戲院大廈地下 D 舖 電話 : 2330 7175 呢間餐廳基本上係我同 BB 既飯堂 , 經常都食 . 價錢經濟又實惠 , 最重要係水準一 D 都唔差 .   呢度最出名就係北海道忌廉飯 , 可以揀漢堡扒 , 吉列豬扒或者吉列薯餅 . BB 基本上每次黎都食漢堡扒北海道忌廉飯 , 忌廉粟米味非常濃郁 , 個汁唔會好傑 , 食落唔會好滯 . 北海道忌廉飯 $ 58 而我呢個烏冬怪 , 就成日都食咖哩烏冬 , 咖喱唔算好辣 , 沒有其他配料 , 我咁大食 , 就咁一碗真係唔夠飽 , 所以我地有時會加多個小食或者湯 . 但係一碗咖哩烏冬只係 $38, 真係非常之抵食 . 咖哩烏冬 $38 仲有就係我地最鐘意點既海老 ( 蝦 ) 天婦羅 , 蝦好新鮮好彈牙 , 炸到岩岩好 , 唔會太油 , 而且外面果層炸粉唔會好厚 . 海老 ( 蝦 ) 天婦羅 $48 最後不得不提呢個麵豉湯 , 只售 5 蚊 , 又有芽菜又有海帶 , 真係好鬼抵 . 除左以上呢 D 野食 , 其他仲有好多都好食 , 例如 : 炸牛肉薯餅 , 燒雞泡魚乾 , 三文魚刺身 . 麵豉湯 $5