平價又好食既拉麵

麵屋丸京

地址: 葵芳興芳路188號地舖

電話: 6107 5869

我男朋友既至愛就係拉麵, 好多大大小小既拉麵店, 我地見有人推介就會去試,今次食呢間無記錯好似上年先開. 上星期見BB陪我行葵涌廣場咁好, 就同佢去食拉麵慰勞下佢啦.

初初上網點解會留意到呢間鋪頭, 係比佢碗拉麵個樣吸引到, 佢成碗麵擺滿左叉燒, 而且有朋友話呢間都唔錯, 所以就一直放左係waiting list準備試. 上星期終於有機會去試. 我地大約夜晚7點幾去食, 間鋪唔係好大,我地都等左一陣, 不過好快就有位.  BB就叫左個極上拉麵, 而我就叫左個半熟卵拉麵.

個拉麵黎既時候, 第一眼望到D叉燒既色水,唔多吸引, 好粉紅色,好似未熟咁, 同平時食開果D好唔同. 不過上網睇過好似佢既煮法係用低溫慢煮, 同平時燒叉燒果D唔同. 但係食左第一啖之後, 竟然比我相象中好咪, 肉質好淋, D 叉燒好好食. 湯底比較濃味同埋 ”杰”, 岩晒我地鐘意口味. 不過如果平時鐘意食清D既湯底, 呢間就可以唔洗試, 你地可能會覺得湯底好咸.

極上拉麵 $83

唔知係咪湯底比較 “ 杰”, 我食果碗已經係正常,無咁多叉燒果款, 食到尾都差D食唔晒,好鬼飽, 所以女仔其實食正常果款就OK, 唔洗叫極上果隻.

半熟卵拉麵$68

個人覺得比起成日有人話好食既豚王同拉麵來,呢間好食好多. 而且價錢又唔貴, 極上拉麵咁多叉燒,咁大碗,都只係83蚊,其實以拉麵黎講真係算平, 出面好多拉麵店無100蚊都食唔到一碗拉麵. (其實我都唔明點解日本食拉麵咁平又咁好食, 點解香港D拉麵要賣到咁貴)