2017 鹿兒島自由行- Day4
朝早去左中央站附近拎車,第一次自駕遊, 上網見到Times
呢間租車公司好似OK,
而且佢係中央站前有得拎車,所以就揀左呢間啦.
點知佢雖然寫中央站,我又無睇清楚地圖,原來黎中央站都幾遠下.
拎住行李行到死下死下.
BB 話不如佢去拎左車黎車我啦,但係用左我本passport
去租車,一定要我去.
下次醒目一定用有車牌果個人既passport去租車.
終於搵到間鋪頭, 雖然店員好多都唔識英文,但佢太多數既catalog,
資料都有中英文比你睇,
所以都唔難明.
但係之後佢地冇啦啦叫我地加錢買多個唔知咩保險服務
(好似係保得多D野),果到就好煩,對方搵左個識講英文既日本人係電話同我地溝通.但係佢D英文真係完全唔明,
我地見唔係加多好多錢,就加埋個個保險算.
搞完一大餐, 有得上車, 佢有單張介紹GPS點用,
但係我地都係搞唔掂.我地明明上網訂左GPS
係中文,
點知又係顯示日文.
最後要叫職員幫我地轉返使中文,
但係佢所謂既中文都只係發聲既時候用普通話,
個平幕顯示既都係日文.
終於出發去霧島啦,揸左大約1個鐘車左右到左霧島,我地去左旅行人山莊check
in 先. 呢間酒店職員大部分英文都好易明,唔難溝通. 由於我地係一泊二食,
Check in 既時候佢會叫你揀埋時間食Dinner, 同埋酒店每間房會包你45分鐘私人時間享用露天風呂,
Check in既時候會叫你揀埋浸邊個,同埋book呢時間浸.我地都叫早黎,但係夜晚8點幾,9點果D時間都比人Book左,
我地就揀左7:30浸.
佢有兩個溫泉比你揀,我地揀左比較受歡迎果個黎浸.
揀完之後,
職員會帶女仔去揀浴衣,
女仔有得揀,但係男仔就得一款,冇得揀.
搞掂好晒之後,
我地就去搵野食啦,成日都未食過野,
餓死人啦.
頭先揸車經過見到霧島温泉市場有野食,我地就去左果度食Lunch.
呢個雖然叫温泉市場,但係10間鋪頭都唔知有冇. 我見D旅遊書介紹呢個霧島温泉市場係一個景點,我自己就覺得唔洗晒時間黎,
當休息食個Lunch都OK
既.
食完Lunch之後,出發去霧島神話之里公園.
神話之里公園入口有架小火車,可以坐上山. 但係要4個人以上先開車,我地見周圍都冇人,得我地兩個,都唔知等幾耐先齊人,所以我地就選擇行上去.
行上去都幾辛苦,但係望到周圍風景咁靚都係值得架.
行到一半既時候,
仲會有山羊同白兔仔睇.
行到咁上下, 可以搭覽車上去山頂觀景台,500
yen包來回. 另外,落黎既時候,你可以選擇搭覽車或者隔離有個石做既滑道,坐住個膠兜咁既野係山頂滑返落去.
雖然覽車既設計有D簡陋,
冇安全帶,感覺好似好危險咁,但其實覽車源斜坡咁上,
離地都唔係好高,
都幾好玩幾特別呀. 返落黎, 我地揀左玩隔離既滑梯,
好好玩呀!
超級推介! 走既時候有D攰,我地就搭返小火車落去.
出發去下一個景點霧島神宮, 15分鐘車程左右, 但係因為GPS
有D錯,兜錯路兜左入一個叫霧島7不思議既地方,
咁岩果度好多樹,冇咩太陽曬到,感覺好陰森.
好有金田一
feel. 用手機GPS搵返路出去, 去到霧島神宮,比我想像中多人,
好似係咁多日行程,比較多人既一個景點.
落車後要行一條長長既樓梯上去,
祈完福,影完相,買左幾個御守就走人.
原本諗住返酒店,但係見時間仲早,就去埋霧島丸尾瀑布,
瀑布隔離有個涼亭,但係因為進行緊維修,我地只可以遠距離咁睇下個瀑布.影完相就返酒店啦.
返到酒店換埋件浴衣,已經差唔多6:00要食晚飯.呢餐有好多細細碟既野食,我地唔識睇日文,都唔知食邊樣先,爬晒入口就算數.之前有朋友黎過已經講過話呢餐野唔係好岩口味,已經有心理準備,唔會太好食.點知唔係唔岩口味咁簡單,係真係好難食.
食完上去房放低D野,
就落去Reception
果度準備去浸溫泉啦.
溫泉既位置需要職員帶路,
行到室外見有度門,職員會提你入左去之後,係門後鎖返門,之後行一條小小既山路,就到個溫泉,
溫泉周圍都係比D機,草叢包圍住,其實夜晚晚都有D恐怖.
不過有個咁私人既環境真係好舒服.初初以為45分鐘好似好小時間浸,但其實
45分鐘都OK, 因為我地兩個都唔係浸得太耐. 浸完行返去既時候,
抬頭一望,
好多星星呀.我最鐘意就係睇星星,
係香港已經冇咩地方可以望到咁靚既夜空,
真係好正呀!
留言
張貼留言